AH&Vety Minister  C. Lalsawivunga chuan March ni 21, 2021-a Lungsen, Lunglei District-a ASF hmuhchhuah a nih atanga vawiin ni thleng hian kan ram economy sawi nghing dawt khawpin ASF avangin kum tin vawk thi leh suat a awm thin thu a sawi a. India Sawrkar laipui thupek angin vawk suatte chauh hi sawrkar laipui bituk zat leh dan dinglai angin zangnadawmna 50% Centrally Sponsored Scheme (CSS) leh State Matching Share (SMS) hmanga pek theih a nih thu sawiin, kum 2022-23 leh 2023-24 chhung khan zangnadawmna atana kan sum mamawh 25% (CSS & SMS) chauh kan dawn avangin zangnadawmna dawngtute hnenah 25% pek a ni, a ti a. 

Minister chuan ranvulhtute hlohna a nasat avangin kum 2024 khan ASF chu Mizoram Sawrkarin State Disaster-ah puangin hemi atan hian ran thi (suat tel lovin) ralna, ran thi pakhat zelah Rs 4000, ralna dawngtu pakhat zelah vawk 6 (paruk) chin huamin Mizoram chhungah ralna sum sem chhuah vek tawh a nih thu a sawi a. Kum 2025 chhunga sum mamawhte chu 2026-27 Action Plan-ah dil mek a nih thu sawiin, 100% hmuh ngei theih nan chak taka bawhzui mek a nih thu a sawi bawk.

Kum 2024 chhunga vawk suatte zangnadawmna hi a vaiin cheng nuai 1559.34 niin, Centrally Sponsored Schemes (CSS) leh State Matching Share (SMS) kaltlangin Central leh State Sawrkar tangkawpa semchhuah tur a ni a. Zangnadawmna sum hi a semna tur hmun District Officer-te hnen thleng vek tawhin, vawiin February ni 23, 2026 hian Cheque emaw Direct Beneficiary Transfer hmangin emaw zangnadawmna dawngtute hnenah pek chhuah tan a ni.

African Swine Fever (ASF) avanga ran suatte Compensation Rate chu hetiang hian siam a ni: Kg 15 hnuai lam - Rs 2,200; Kg 15-40 inkar - Rs 5,800; Kg 40-70 inkar- Rs 8,400; Kg 70-100 inkar- Rs 12,000 leh Kg 100 chunglam ah  Rs 15,000  a ni.